მინდოდა გამოვსულიყავი….

არ მომასვენესთქო ვერ ვიტყვი, რა ძალა მადგა?! მე თვითონ არ მოვასვენე ჩემი თავი. წადი რა დაწექი დაიძინე, ხვალ რვის ნახევარზე ასადგომი ხარ. მომინდომა აქ მწერლობა! ჩემი ბრალია მოკლედ და თეამ და გვირილამაც დამიმატეს, ხალხის სულებში ჩავიხედოთ, რისი ნიჭი ჰქონდათო ქვეცნობიერად! აბა სად უნდა ჩავიხედო ეხლა მე, თუ ჯერ საკუთარ თავს არ ჩავხედე იქნებ რამე დავინახო შიგ! ვზივარ ახლა და ვიხსენებ, რა მინდოდა ბავშვობაში? პრინციპში ბევრი რამე მინდოდა და ახლაც მინდა აბა სხვანაირად რაფერ იქნებოდა…

ალბათ ბავშვის ოცნება მაინც მეტწილად ისევ ოცნებაა მხოლოდ. გაუაზრებელი და ფარატინა ფიქრად მოსული. დიდი ექსტრიმისტი არასოდეს ვყოფილვარ და ცხოვრებისეულად კი მქონდა გადაწყვეტილი არქეოლოგობა! სიდან? სიდან ამხელა ამბიციები? ახლაღა ვეკითხები საკუთარ თავს! თუმცა ალბათ ერთადერთი მიზეზი სათავგადასავლო და ისტორიული რომანების მთელი დასტაა, რომელიც საკმაოდ დიდი დოზით მქონდა შეწოვილი იმ დროისთვის! მიწისგან შორსაც არასოდეს ვყოფილვარ ასე რომ მისი თხრა და ჩიჩქვნაც არ მეთაკილებოდა და მზად ვიყავი შლიმანის გზა მეორედ გამევლო! მით უმეტეს ამ ყველაფერს თან სდევდა უამრავი მოგზაურობა ქვეყნიერების ყველაზე ეგზოტიკურ ადგილებში! მერე ცოტა წამოვიზარდე, ოცნებებმა ფერი გაიმუქეს… ყველა არქეოლოგიურ ექსპედიციას, წიგნებში თუ ფილმებში ჭირდებოდა სპონსორი და ყოველთვის ძნელი საშოვნელი იყო. როცა ყველა ეს ისტორია მაშინდელ რეალობას დავადე ზემოდან და გავაშუქე, აბა რა უნდა მიმეღო? კელტების უძველესი ქალაქების აღმოსაჩენად გამზადებული ჯგუფი ელის დაფინანსებას და ამ დროს რა ხდება ქვეყანაში? უშუქობა, უგზოობა, შიმშილის საოცარი დონე, ეკონომიკა, რომელიც მხოლოდ სიტყვაა და მეტი არაფერი მსგავსი არ არსებობს… კიდევ უამრავი ასეთი ფაქტორი, რომლების ჩამოთვლასაც არ დავიწყებ იმიტომ რომ ყველას მოგეხსენებათ რა იყო საქართველოში თხუთმეტი წლის წინ!
რეალობის შეგრძნების მატებასთან ერთად ჩემი მომავალი პროფესიაც კარგავდა ფერს სანამ გამჭირვალე ტკბილ მოგონებად არ დარჩა სამუდამოდ. მას შემდეგ ბევრი რამე შეიცვალა და საკამოდ სწრაფადაც. ქიმიკოსიბიდან დაწყებული რალის მრბოლელით დამთავრებული ყველა ჩემი პროფესია იყო, ერთადერთი რაც ყოველთვის ვიცოდი პატარაობიდან, ის იყო, რომ ექიმი არასოდეს დადგებოდა ჩემგან და ამის არანაირი სურვილიც არ მქონია! ბოლოს კი წარმატებული ეკონომისტიდან მანქანათმშენებლობის ინჟინერად გადავკეთდი! შემიძლია ჩემ თავს უნივერსალური ,,სპეციალისტი’’ ვუწოდო… 🙂
ზოგი მხატვარი გამოვა, ზოგიც მფრინავი, მაგრამ ყველას გექნებოდათ ბავშვობის ოცნება პროფესიულ სფეროში და ზოგმა ალბათ აისრულა კიდეც ის. ასე რომ აქსიომ, ჯესი და ქეთუსი ველით პოსტებს…

 

Posted by შიო on აპრილი 11, 2011

https://shiosmarani.wordpress.com/2011/04/11/%e1%83%9b%e1%83%98%e1%83%9c%e1%83%93%e1%83%9d%e1%83%93%e1%83%90-%e1%83%92%e1%83%90%e1%83%9b%e1%83%9d%e1%83%95%e1%83%a1%e1%83%a3%e1%83%9a%e1%83%98%e1%83%a7%e1%83%90%e1%83%95%e1%83%98/